Nthomba yobwera moyambirira -  

zimagwira mbewu pomwe zangomera kumene. Zimapangitsa masamba ambewu kuyoyoka ndipo zokolola zimachepa. Matendawa ndiowopsa ku madera akumtunda. Masamba amakhala ndimadontho ozungulira ofiilira pamwamba patsamba ndipo kunsi kwa tsambalo kumaoneka khakhi.

Nthomba zobwera mochedwa –

 zimagwira mbewu mochedwerako poyerekeza ndi nthomba yoyamba ija. Masamba amayoyoka zomwe zimachepetsa zokolola. Matendawa ndiowopsa ku madera otsika monga mmphepete mwa nyanja ndi kuchigwa cha mtsinje wa shire. 

Dzimbiri –

Matendawa amagwira mbewu nthawi imodzi ndi Nthomba zobwera mochedwa. Masamba amaoneka ndi madontho a mtundu wa chikasu. Madonthowa amapangisa mabowo patsambapo zomwe zimapangisa masamba kusintha mtundu ndikukhala ofiira, kenako masamba amawuma. Poperani mankhwala a Daconil pakatha masabata awiri.

Khate la mtedza - 

matendawa amayamba ndi kachirombo kosaoneka ndi maso kotchedwa virus. Amagwira kwambiri mbewu zomwe zobzalidwa mochedwa komanso momwe muli mipata kapena mbewu sizinamele bwino. Mbewu zomwe zagwidwa ndimatendawa sizikhala zobiriwira ndipo sizikula. Bzalani mbewu moyambilira komanso yopilira kumatenda.